انا والشعر فـي بيـت المعانـي
وروض الشعر من زهره عطاني
عبيـر الـورد واليشمـوم فيهـا
تعطـر مـن مطايبهـا لسانـي
ثمان شهـور والغربـة مريـرة
وميسمهـا علـى قلبـي كوانـي
وحدتنـي ظروفـي للمهـالـك
وسيف الوقت في دربه طوانـي
وصارت عيشتي من غير طوعي
وجور الوقت بجيوشـه وطانـي
اذا جا الصبح حارت بي هجوسي
واذا جا الليل جيش الهـم جانـي
ثمـان شهـور ماليـلٍ نسيـتـه
أعـد الوقـت فيهـا بالثـوانـي
ثمـان شهـور لكـن فالحقيقـة
تعادل بالسنيـن أجـزم ثمانـي
ثمـان شهـور وابغاهـا تعـدي
عسى يمكـن لعلـي أو عسانـي
ثمان شهـور ياذيـب الغـداري
اشوف الروح ضاق بها كيانـي
ودارت ضدي الحرب ورعدهـا
كما دور الجمل بيـن السوانـي
اكافـح رمحـهـا ولا المهـنـد
وانـا لادرع والساحـة بيانـي
وكل الجيش ينظـر لـي بعينـه
اشـوف انـه بطعناتـه نوانـي
يقـول القايـد لهـم ويعنـانـي
هذاك اللـي نبـي دمـه مهانـي
وانا من بينهـم عينـي بصيـرة
اشوف الـذل ودروب الهوانـي
وكانـت نظرتـي يـم الثـريـا
مابين الجدي وسهيـل اليمانـي
اساهر نجمهـا فـي كـل ليلـة
وبنيت بعالـي النجمـة مبانـي
وينهاني عن الهوجـاس ناهـي
وراع الطيب عن دربي نهانـي
وعشت ايام عمري فـي شماتـه
وصـار الكـل بلسانـه رمانـي
يقول الصاحب الوافي: علامـك
وش اللي منـه ياقلبـي تعانـي
اجامل كل مـن روحـه سعيـده
لاجل ترضى عيون اللي شراني
اجامل وابتسم واضحك واغنـي
وانا صدري به الضيق احتوانـي
اجامل واكتم الضيقـة بصـدري
وجيش الهم مـن ثوبـه كسانـي
اجامل هاجسي في كـل لحظـة
واقول اصبر على ضيم الزماني
اصالي لاهـب النـار الوشيمـة
وضيم الحزن من كاسه سقانـي
حوادث تجعـل الدنيـا عجايـب
عساها درس للقاصـي ودانـي
وهذي قصتـي ياطيـر شلـوى
عسى مايرجـع المـوال ثانـي
وهذي قصتي ماانسـى خبرهـا
ولو طـال الدهـر والا نسانـي
ألا يـازيـن دارك يـاوطـنـا
ترانـي عاشـقٍ دارك تـرانـي
ياوجد حالي على اللي مغلق جهازه *
* لاوحيت صوته ولاجتني مراسيلـه
الصاحب اللي غرامه خافقي حازه *
* سيطر على نبضته في اليوم والليله
له منزلٍ ماحدٍ في غيبتـه هـازه *
* باقي على العز لو قلّت مواصيلـه
واليوم نفسي من الاصحاب منحازه *
* عفت المجالس من اللي نافلٍ جيله
جوالي اليا طلعت البر مااعتـازه *
* ارتاح مااحدٍ ينادي لي وانادي لـه
وهجوس قلبي لطرق القاف فزازه *
* تفز فـزات خيـالٍ سـرج خيلـه
ياقلب عمر الجفا مايقضي العـازه *
* والحب يشقيك وتضرك غرابيلـه
ومادام شكلك غـدا تقـول دروازه *
* متربعـة فيـك وتغنـي مواويلـه
قم واهدها باقه من الورد في فازه *
* عربون حبٍ بوسط الخافق تشيلـه
لاهديتها كل صعبٍ عنك تجتـازه *
* والود من شوقها تمطـر هماليلـه
ثم بعدها تنجز اللي يصعب انجازه *
* والخاطر يطيب وتسـرك تعاليلـه
ماعاد أنا عشاق لو قلت عشـاق
ولاعاد لي في العشق رده وصده
ياكم على وضح النقا خلت براق
على النقا والطيب اصـده وارده
لكن عصمني عنه خالـق ورزاق
ولاعاد ابي يصير لـي فيـه رده
هيضتني للحب وايـام الاشـواق
وذكرتني برق البروق المصـده
العشق ودعته وقلبي منـه فـاق
خليتـه لراعـي نيـاق يــوده
اشغلته الخلفات واوثقتـه اوثـاق
يحبها حـبٍ ماحـد حـب قـده
يروق بالـه كـل مابالهـا راق
يرعى الحيا في سهلة مجرهـده
لكن ليا حبيت حـذراك تنسـاق
الا لحـبٍ كـل هـاوي يـعـده
ان كان ماتنشف على شانها ارياق
من طيبها تهرج بهـا كـل بـده
خل امرها جعل امرهذيك ينعـاق
تلقـى بدلهـا عيطمـوسٍ تنـده
عمهوجةٍ تطلع على كل الاعنـاق
وجدك قريبه او ولد عـم جـده
مركوزة النهدين مجدولة السـاق
والورد مزروعٍ على جلـد خـده
من حبها يبقى على طول مشتاق
يذكر كلام اللي سبـق بالمـوده
(ياليت ربي ماخلق حب وافراق)
والا خلق حبٍ تطـول بـه مـده
واليوم ياراع القلم هـات الاوراق
مابه خوافي والهوى بـاح سـده
صاحبك في متعة وله وقت ماذاق
ماذاق نوم وعينـه لبحـر جـده
باسباب همٍ محرقٍ جاشي احراق
الله يكافينـي شـروره وضـده
همٍ يجول ويشـدي لـدق دقـاق
دقـاق بيـرٍ مالقـى فيـه نـده
لولا يسلي خاطري كل ماضـاق
شوف البكـار بسهلـةٍ مجرهـدة
يروق بالـي كـل مابالهـا راق
واحبها حبٍ ماحـد حـب قـده
هذيك عندي سيـدة كـل الاذواق
وهي البقا لظروفـي المستجـدة
القلب ماعاد ينبض بالهوى العـذري
جفت عروقه ماعاد اوحيت نبضاتـه
من اولٍ كان باسباب الهوى يسـري
مسرى محبٍ سرى والليـل مافاتـه
واليوم قررت ابيعه وين من يشـري
يشريه من شان صولاتـه وجولاتـه
لو كان مابه بلاء والنـاس ماتـدري
ياناس من يحتويه يقـول لـي هاتـه
انا ارحمه من سوالف طلعة الفجري
نـاسٍ تسمـم خناجرهـا بطعناتـه
والصاحب اللي خياله دايـمٍ يطـري
عليّ لاوحيت طاري الحـب وآفاتـه
لاضاق صدره يضيق بضيقته صدري
وان عاش الافراح قلبي عاش فرحاته
من لوعة الحب اردد قولتي مـدري
مدري عنه ليـش عذبنـي بصداتـه
ماعاد جاني خبـر عنّـه ولاعـذري
ولاعاد داعب حمام الـورق بابياتـه
وانا كريم الفعايـل مانقـص قـدري
غادرت يوم امنعت قلبـي محطاتـه
والله يالولا الحياء والدين والصبـري
والمسلم تزيد في صبـره صلواتـه
لاقول هو السبب ليا حفـروا قبـري
وهو السبب لاحضر موتي وسكراته
لكن خل السفينـة فالبحـر تجـري
يلعب بها المـوج بافعالـه وسكناتـه
يامرحبا واهلين وافراح وسـرور
يالصاحب اللي نـادراتٍ خصالـه
ترمي علي اللوم وآقـول مشكـور
وتظن بي هجر الهوى واعتزالـه
يعني نسيت الحب والحب مشهور
شربت حبـك ليـن حـد الثمالـه
ماترحم اللي في محبتـك مذعـور
هايم ولالـه فـي طريقـك ميالـه
والمشكلة حبي مع الناس محصور
محصور في شخصك ولابي بدالـه
مرت سنة وآنا من الهجر مقهـور
وجدي كما اللي فاقـدٍ كـل مالـه
مرات اقول اني من العين منظـور
ابي الدوا وارجع اقـول استحالـه
وامرار اشك السحر وآقول مسحور
من شافني قال انت حالتـك حالـه
انا الكسير بكسر ماهـو مجبـور
برمح الحبيب اللي حرمني وصاله
عز الله اني من رسالتك مسـرور
وانـا بعـد جيتـك بآعـز حالـه
كيف انت قلي يابعد قلب (......)؟
ياشبه بدر الكون وقـت اكتمالـه
اسرجت ظلمة خافقي باوضح النور
وعيشتني طيش الفرح والجهالـة
اهم شي رضاك لو ضاقت صـدور
وغيرك يروح بعيد مالـي ومالـه
ذكرك يسلي خاطرٍ بـات مكسـور
وشلون لو شافـك خليلـك قبالـه
اوقدت في صدري غرامك بدافـور
وعلمتني جرح الهـوى واحتمالـه
السيد الآمر وانـا عبـد مامـور
خلوه يفعـل يابشـر مابـدى لـه
ولو اعتذر بالقول مانـي بمعـذور
بس اشكرك يومك كسبت الجمالـه
في هاجسي شيٍ مثل زامي المـوج
يزفنـي وآقـول غـصـبٍ علـيّـه
يـارد عليّـه مثـل وراد هـيـدوج
اللي عليه النـاس صبـح وعشيّـه
ومن كثر مايضغط علي فج له فـوج
يلعب بسيفـه فـي زوايـا الحنيـه
ولو اني اكتم شي في صدري يلـوج
فج النحـر واظهـر مواريـه فيّـه
هذا وانا يانـاس مانـي بمرجـوج
واحسب حساب الصايبـة والخطيـه
لكن بلاني صاحـبٍ صمّـم الـروج
بالشفـة اللـي بالمباسـم طـريـه
والطرف ناعس باسود الكحل مدعوج
والرمش والحاجب سهـوم المنيـه
والخشم كنه سلة السيـف عمهـوج
والخـد مثـل الـوردة النرجسيـة
والعمر غصن الموز لاحـل منتـوج
والعنـق عنـق الظبيـة الطايفيـة
صدفة لقيته ضايق الصدر مزعـوج
يشكـي غرابيـل الزمـان الرديـة
يقول لو تسمح نبي ضحك وهـروج
ونطرد عمـاس الـراس بالشاذليـه
ودرب الردية دربنا عنـه مسهـوج
صافيـن نيـه والمذاهـب نقـيـه
يقول انا من طيبتك عشـت مفلـوج
ورّدتنـي بيـر الـغـرام العـذيـة
ولو اني ابغى روحـةٍ معـه لاادوج
وآمتّعـه واعيـش عيشـة هنيـة
لكن لي مبدا علـى الحـق منهـوج
وانا عـن المنقـود نفسـي غنيـة
بالشعر كلٍ لـه مساليـك وفجـوج
وكـلٍ يظنـه جـاب ميـه بمـيـه
احدٍ دخل لـه منـزل مابـه ولـوج
يشعـب ركابـه فـي ديـارٍ خليـه
واحد نسج شعره كما الزل منسـوج
قـولٍ يسلـي بـه نفـوسٍ شقيـه
واحدٍ بنى للشعر صـالات وبـروج
وكفه مـن اجـزال القصايـد نديـه
( يابنت لولا اللي على تاسع الفوج)
القايـل مـودع والابيـات حـيـه
ليا انعمس بالـي بجزلاتـه آلـوج
وآخذ معه سجـة وروحـة وجيـه
وترى طراة العمر لاعشـت مبهـوج
والعـز ملبوسـك ونفسـك تقـيـة
اللي فقدتـه يابشـر ويـن ابلقـاه
ياناس قولوا وش يـرد المصيبـة
شخصٍ رحل من هو يجيبه لدنيـاه
تعجز ملاييـن البشـر ماتجيبـه
خـلٍ فقدتـه راح مانـي بويـاه
ودعنـي الله حسبـي الله حسيبـه
يافزعـة الله والقـدر ويـن وداه
ياقو قلبـي يـوم شلـت النصيبـه
من يوم وادعني حشا كيف ابنسـاه
ماانساه لـو دارت علـي الغليبـه
حبه بنا في داخـل القلـب مبنـاه
قصر الملـوك المانعـات المهيبـه
ياما على طاريـه دمـعٍ نثرنـاه
لاحل فـي وادي يسيّـل شعيبـه
ماذقت حلو النوم من عقب فرقـاه
نار الفراق بوسط صـدري لهيبـه
يضوي خياله لااسدل الليل ظلمـاه
ويشعل مشاهيب الهمـوم الكئيبـه
هو يبتسم وانـا حزيـن المناجـاه
اضحك معه واثر المدامع سريبـه
ماافطن الين اني أحوّل على مـاه
وآرد على جدب الرمـال الكثيبـه
من قبل لايرحل ذبحنـي بلامـاه
زوله. كلامه. مدري فعول طيبـه
لاحل ذكره قمت احيـي بذكـراه
وافـز فـزة مـن يـرد الذهيبـة
يفز له قلبـي ويطـرب لطريـاه
وانا أسيـرة بالسيـوف العطيبـة
الصاحب اللي ينعش الراس صحباه
في رفقتـه مافيـه شـيءٍ يعيبـه
شخصٍ عزيز وجنة الروح لقيـاه
حالي بعد فرقـاه راحـت نهيبـه
قالوا علامك ناحل الجسم قلـت آه
هذاك مفعـول الرمـاح الحريبـة
واجرحي اللي ماحدٍ يعـرف دواه
جرح عميق ويذبح اللـي يصيبـه
لكن انـا صابـر ورجـواي بالله
خالق عباده وامرنـا ينتهـي بـه
الله يكتـب لـه كريـم المجـازاه
اطلـب لعلـه بالمكـارم يثيـبـه
وارجي لعله جنـة الخلـد مثـواه
والباقيات الصالحة مـن نصيبـه
يامل قلب جيوش الحزن ياطنـه
وطي الطروش المغاتير المحيلاتي
لاجيت ابسلى هموم الليـل ودنـه
ورى النجوم السهيرات الطويلاتي
على حبيبٍ منايا الوقـت شالنـه
شيل الجمل للحمولات الثقيلاتـي
عليه قلبي ركاب الشوق يشعنـه
نسايم الحـب قطـاع المسافاتـي
واقلبي اللي قيـود الحـق تلنـه
لين اوقفت به على مر الفجيعاتي
عليه عيني تهـل الدمـع وتكنـه
لين اغتسل خده الطاهر بعبراتي
هذيك دمعة عزيزة حرهـا كنـه
شعايم النار في وقـت اللهيباتـي
غدا نهاري مثـل ليلـي ولكنـه
ملكني الصبر وعزومي قوياتـي
آقول مامات وابكي واذكر الجنـة
يارب تغفر ذنوبـه والخطياتـي
لاجيت اخفي الحزن خانتني الونه
وكلٍ درى في خفيات المعاناتـي
ياكم بنيت الامـل واليـوم هدنـه
اقدار الازمان وكبـار المنياتـي
ماباقي الا حبيبٍ فالعمـر سنـه
علقت فيه الرجا كـل العلاقاتـي
بالفعل مايفرقه مهمـا بـدر منّـه
والعرق واحد ولاتغزيه نزعاتـي
يمكن يسد بمكانه لاحضـر عنّـه
لاصار شخصٍ كبيره فيه هقواتي
رايي على رايه وظني على ظنه
واكبرت فيه الامل باقي سنواتـي
والحمد لله عظيم الفضل والمنـة
الخالق اللي رفع سبع السمواتـي
وختامها ريح هيل فاح فـي بنـه
يالله انا طالبك جبر المصيباتـي
الا واقلبي اللي مـن فـراق الغانميـن اهتـم
تركني صاحبي والنفس فـي فرقـاه لوامـه
الا واشيب عيني من مكان المجلس المضـرم
غدا مثل المراح اللي غشـاه العـج باكوامـه
وانا قلبي جفا العالم وشتّـت جمعـه الملتـم
وروّح يدفن ايام الوصـال ونكّـس اعلامـه
عزايه فيه واعـزي هذيـك الناقـة المجهـم
تحن وتختلج من حر فرقـى شامـخ الهامـه
انا اشهد خوته مكسب انا اشهد للظهر محـزم
عصابة راس للي صابرٍ عامـه ورى عامـه
الا ياناس كيف ابقى وهمـي زاد فوقـه هـم
تعبت اكتب حقيقة هالزمن وآعيـش باوهامـه
تعبنا من عنا الدنيا ونشرب مـن يديهـا سـم
مصير اللي يحب انسان يصبح فاقـد احلامـه
انا الشاعر وانا الكاتب وانا العاشق وانا المغرم
وانا تهت ببحـور وسطهـا تسعيـن دوامـه
وانا مثل الجريح اللي جروحه كم يعـد وكـم
ليـا منّـه تذكـر صـورة الغاليـن قـدامـه
جدايه في دموعٍ صار ماها في عيونـي جـم
اكن الدمـع لكنـه فضحنـي سايـل اقلامـه
ماعاد ابغى صريحات المحبة والهوى المبـرم
حقايق شاعرٍ خيم زعيـم الحـزن باعظامـه
ديار الشـوق اودّعهـا واودّع ليلهـا المظلـم
وابعلن هالرحيل اللي حضر في تالي اعوامـه
بعد خيّلت فوقي سحايب هـلاك الكـون
تحققـت مـالـي لانـجـاةٍ وتحويـلـه
بروق الهوى تبرق وانا الجاني المسجون
وعيني تشوف ولامعـي ياعـرب حيلـة
ولاصار فيه رعـود ياقلبـي المحـزون
حياة الغبـن تقتـل فـوادي قتـل غيلـه
حاولت اغض العين عن شوفة المزيـون
ولكنهـا صدفـة وجابـت لـي الويلـه
على زود زينه جرّ مشيـه علـيّ بهـون
بليا تكلـف صـان مشيـه عـن الميلـه
تقول انها تمشـي علـى دقـةٍ ولحـون
تقاصر خطاها كـن شاعـر يغنـي لـه
رماني بنظره مـن بعدهـا وانـا مغبـون
جماله ونور الخـد يشعـل ورى الشيلـه
وانا يوم شفته صاب قلبي ثمـان طعـون
وقلبي هلك والهـم عنـدي سـرى ليلـه
بعد مامشى والحال من دونهـا فـي دون
بعـد مـاوزن قلبـي وخانـت مكاييلـه
شحنت الخفوق بقطع دربه وهو مشحـون
وتحمّلـت عاقبـة العنـا مـع تهاويـلـه
وقفت بطريقـه قلـت ياخـارق القانـون
اجل تزرع المحيـا وتحـرق محاصيلـه
حرام الذي تفعـل يقيـنٍ بـدون ظنـون
جـدار الهـوى تهـدم وتبنـي محابيلـه
ضحك من سوالي قال يالعاشق المفتـون
هـوى قلبـك الاخضـر نتايـج تحاليلـه
حذاري من النظرة ودرب الهوى ملعـون
خطيـرٍ علـى مثلـك تلوعـك غرابيلـه
يقول انت ماتعرف غلا الجوهر المكنـون
وانا ماقصـدت انـي ازوّد لـك الكيلـه
طلبتـه بعـد هـذا اشوفـه ولايـدرون
واروّي خفوقي واكحـل العيـن تكحيلـه
وعدني وراح وصار بعد الوعـد مديـون
ولاادري وش اللي صار واخلف مواصيله
مااظنه يكذّب في وعوده معـي ويخـون
وهو من عرب واودع ضميري معاديلـه
انـا فاقـدٍ وصلـه الاياعـرب تكفـون
ابي كل عـارف يذكـره فـي مراسيلـه
الاياعساه بخيـر يغشـى سمـاه مـزون
وطلبت الولي لقيـاه واشـرب فناجيلـه
لبيـه ياشاعـر بالصـوت نادانـي
ناديـت باسمـه وقاويتـه وحييتـه
الشاعر اللي لـه القيفـان ميدانـي
والشعر سيفه وكل المجد فـي بيتـه
ذكر لي الخاطر اللي منه مرضانـي
وضرب برمحه وانا بالقول جاريتـه
سافر على الدرب ذاك الراس لاهاني
يبي ديـار الخليـل اللـي تحرّيتـه
وصّفت له بيت راعي دعج الاعياني
اللي هجرنـي بليـا ذنـب سويتـه
من سبته ناديت (تكفى) كل من جاني
وانخاه يفزع ولاادري ليش ناديتـه
غروٍ عليه الخفوق الصلب ولهانـي
عدّيت حـد الغـرام اللـي تخطّيتـه
لكن (قول وفعل) فاجـاه الاخوانـي
وانا ادري اني على السيفين حدّيته
سيف الوصية بيمنى ذرب الايمانـي
وسيف المشاعر على ماقيل عدّيتـه
واقول مني وفـا شكـرٍ وعرفانـي
للصاحب اللي فزع لي وارتفع صيته
هل أعجبك النص الأدبي نعم أم لا رأيك يحترم!
0 التعليقات:
إرسال تعليق